Friday, September 23

राजनितिक दलहरु विच एमसीसी संसदमा पेश गर्ने सहमती !

१ फागुन, काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र एकीकृत समाजवादीका अध्यक्ष माधवकुमार नेपाल अमेरिकी सहयोग परियोजना मिलेनियम च्यालेन्ज कम्प्याक्ट (एमसीसी) संसदमा टेबल गर्न सहमत भएका छन् ।

स्रोतका अनुसार सभामुख अग्निप्रसाद सापकोटा पनि सहमत भएकाले सम्भवतः बुधबार ४ फागुनको बैठकमा एमसीसी टेबल हुनेछ । सोमबारलाई तय भएको प्रतिनिधि सभाको वैठक दुइ दिनपछी सारेर फागुन ४ गते बोलाइएको छ ।

प्रधानमन्त्री शेरबहादुर देउवाले एमसीसी संसदमा टेबल गर्न निरन्तर पहल गर्दै आएका थिए । तर सत्तारुढ माओवादी र एकीकृत समाजवादी सहमत भएका थिएनन् । सभामुख सापकोटाले पनि राष्ट्रिय वा सत्तारुढ गठबन्धनमा सहमति नभएसम्म एमसीसी टेबल नगर्ने अडान राख्दै आएका थिए ।

तर अमेरिकाले एमसीसी सम्झौता प्रतिनिधिसभाबाट अनुमोदनका लागि २८ फेब्रुअरी अर्थात १६ फागुनसम्म समय दिएको छ । बिहीबार मात्र अमेरिकी सहायक विदेशमन्त्री डोनाल्ड लुले देउवासहित माओवादी अध्यक्ष पुष्पकमल दाहाल प्रचण्ड र नेकपा एमालेका अध्यक्ष केपी शर्मा ओलीलाई फोन गरेर २८ फ्रेवुअरी सम्म एमसिसिबारे निर्णय दिन आग्रह मात्र गरेनन्,

एमसीसी फिर्ता भए चिनियाँ हस्तक्षेपका कारण आफ्नो अनुदान सहयोग लिएन भनेर बुझ्ने चेतावनी दिए । यसले चर्को दबावमा परेका नेपाली कांग्रेसका सभापति समेत रहेका प्रधानमन्त्री देउवाले शनिबार माओवादी केन्द्रका अध्यक्ष प्रचण्ड र एकीकृत समाजवादीका अध्यक्ष माधवकुमार नेपाललाई एमसीसी संसदमा टेबल गर्न सहमति मागेका थिए ।

प्रधानमन्त्री देउवाले भनेका थिए, ‘बरु तपाईंहरु त्यो दिन उपस्थित नभइदिनुस्, उपस्थित भए के गर्ने आफैं निर्णय लिनुस् । तर संसदमा टेबुल गर्नुपर्यो ।’ बैठकपछि माओवादी केन्द्रका अध्यक्ष प्रचण्ड निकट स्रोतले एमसीसीबारे कुनै सहमति नभएको बताएको थियो ।

तर कांग्रेस निकट स्रोतले भने एमसीसी टेबलका लागि प्रचण्ड र माधव नेपालसँगै सभामुख पनि सहमत भएको दाबी गरेको छ । स्रोतले भन्यो, पास गर्ने बेला प्रचण्ड, माधव नेपालहरु अनुपस्थित हुने वा के गर्ने भन्ने छलफलमै छ । तर एमसीसी टेबल गर्न दिन उहाँहरु तयार हुनुभएको छ ।’

यो खबर पढेर तपाईलाई कस्तो महसुस भयो ?
+1
0
+1
0
+1
0
+1
0
+1
0
+1
0
+1
0
सेयर गर्नुहोस
प्रतिक्रिया दिनुहोस!